城中鏡：立會大樓設計師冇諗過會被撞擊
話說立法會財務委員會審議新界東北發展前期撥款，引發反對計劃嘅示威者衝擊立法會大樓，大樓一攻即破，多處地方出現破損兼被指「豆腐渣工程」。負責設計政府總部「門常開」嘅國際知名建築師Rocco嚴迅奇尋日出席珠海學院屯門青山灣畔新校舍嘅地基竣工儀式時回應話，設計「門常開」嘅時候冇諗過會被示威者強行衝擊，仲話如果咁樣衝法乜都會爛喎！
嚴迅奇話設計政府總部同立法會大樓時，冇預計會遭受強行撞擊。
劉皇發自備鴨嘴帽遮擋陽光。
謝凌潔貞熱到不斷抹汗。
謝凌潔貞著住厚長褸出席儀式。
Rocca強調政府總部同立法會所用嘅物料都冇偷工減料，佢哋都係跟住政府要求去做，但點解會咁易撞爛呢？佢話設計大樓時只會預計可以承受一般撞擊，但如果有人故意強行衝撞，佢哋就無法保障，始終有心撞一定有方法撞爛。
謝凌潔貞31℃著大褸
咁乜嘢叫做一般撞擊呢？Rocca話一個人撞埋去啲鋁板度，咁就應該唔會爛，但如果用鐵撞擊，鐵鬥鐵就好難避免會破損啦！至於早前立法會門外地面鑽窿用作鎖鐵馬之用，佢就話呢方面冇人同佢講，佢亦冇去睇過，所以評論唔到嘞。
新界鄉議局主席劉皇發同教育局常任秘書長謝凌潔貞亦有出席活動。話時話，個地基竣工儀式喺空曠嘅地方舉行，事前應該估到有機會暴曬，加上尋日中午氣溫仲高達攝氏三十一度，烈日當空下，現場個個嘉賓都熱到汗流浹背，但主禮嘅謝凌潔貞竟然仲要着住件厚厚嘅長褸。莫非佢着錯衫？見佢身穿一條黑色連身裙，本來都已經特別吸熱，加埋件厚厚嘅長大褸，真係睇見都戥佢熱，難怪佢喺台下要不斷飲水解渴兼用紙巾抹汗喇！
