城中鏡：周國豐教仔以武德服人
香港國術總會前晚舉辦詠春師傅江志強講座同示範活動，香港國術總會會長王嘉恩同副會長周國豐都有出席，周國豐仲即場示範咗幾十式木人樁，佢透露木人樁共有一百零八式，佢依家先學咗一半，又話：「屋企都有個木人樁放喺天井，但呢排成日落雨練少咗。」
周國豐即場示範咗幾十式木人樁。
咁囝囝有冇學武術？佢話大仔四歲，對武術亦有興趣，依家學緊跆拳道，被問到會唔會成日郁手郁腳打人時，佢話：「我成日教佢學武最重要有武德，唔可以亂打人，同佢講武力解決唔到問題，而且大部分武者都唔會以武力解決，就算畀人襲擊首先都會選擇走，練武嘅人主要係學危機意識。」被問到練武係咪以防被綁架時，從小已習武嘅佢話：「都有啲幫助，但如果遇到咁嘅情況，以一人之力都做唔到啲乜，只係危機意識比人快少少。」
