「嘩！真係無王管！話衝擊立會就衝擊！」米妮芬不滿。身旁元秋猛力點頭，「咪係！如果阿王喺度，拎把金鉸剪出嚟一剪，咩問題都解決晒啦！唔知佢又日以繼夜，夜以繼日咁去咗邊呢？」

「兩位議員，唔使句句有骨嘅。」財萎會星爺面對彪悍女性，懦弱盡現。「一句到尾，你有咩計保障我哋安全？」米妮芬愈講愈不耐煩。星爺靈光一閃，「有計，繼續拉布，示威者自然唔會衝擊啦！」元秋一記「獅吼功」，「拉布？拉你個無能主席落台，換人頂你就差唔多。」

一句正中要害，星爺反擊︰「又要企硬，又要淆底，運路走囉！」「淆得過你？要即刻腰斬會議！而且你估我哋唔想走咩？落咗閘，閂晒門，密不透風，真係連個窿都無！」元秋慨嘆。

星爺聽到，一臉無奈︰「想搵窿捐？其實唔難，示威者撞爛咗外牆，大大個窿喺度，問題係我哋有無膽捐出去啫……」

第一手消息請下載on.cc東網iPhone/iPad/Android/Windows Phone Apps