透過觀察，睇住呢個香港特區政府如何處理新界東北的抗爭事件，完完全全感受到香港之亂，肯肯定係一棚垃圾廢柴庸才官員一手造成的！

嗱！喺立法會財委會六次審議撥款期間，明顯看到吳亮星那副無能窩囊貌，處事不公，慌張失措，當門外烈火熊熊，民怨沸騰時，佢仲唔知碇的想夾硬表決，唔衰收尾冚旗，就天冇眼啦！

窩囊廢的吳亮星，只是一隻被送過河等死的卒仔啫！背後推佢受靶的，亦非良才，反之，更低莊、陰險和狠毒！

新界東北發展的主事官員，「面帳」揸Fit人由囤地波擔當，未做已輸晒啦！點可能一個咁龐大利益嘅Project，交由個「名不正、言不順」、有囤地嫌疑嘅積犯做o架？乜誠信都冇啦！

當連續幾個星期五審議，都被反對者包圍立法會時，你囤地波就唔好再揀星期三落區做Show啦！那「地區諮詢」的窘態，於星期四見報，咪提醒更多人星期五再圍你！白癡仔！

唉！好心啦！明知扮嘢搞「假諮詢」，就好應事前摸清「協辦單位」班友嘅底先啦！有被迫遷嘅苦主抗議就肯定o架啦！但那批話嚟撐政府嘅「鄉紳賢達」，藉閃光燈對住下，當面要求加額補價，跟住拖馬拉隊離場，咪又畀人過一戙囉！

由一條小村莊，幾百人嘅事，弄致全港幾百萬人嘅事，源於這個無誠信嘅大話精政府對開發「大東北」的粗暴橫蠻，從無講個清楚明白。而背後隱瞞和欺騙緊香港市民啲乜嘢呢？才是關鍵！

家陣，因呢單嘢辣慶大眾，令全民公投和七一遊行更火上加油，署任特首林鄭仲加把口話「不可能不遷不拆」，驚香港未死乎？

一班九流嘅廢柴，喺公廁洗馬桶都冇能力啦！仲話做發展政策嘅高官，香港唔PK至奇矣！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps