政壇：發展局短片撐發展東北
發展局為新界東北發展前期撥款盡快通過招數層出不窮，先於社交網站推出一問一答嘅「常人包」，反駁反對新界東北發展團體推出嘅「懶人包」，直到尋日再升級將戰線擴展至有聲有畫嘅短片。發展局喺YouTube上載四段短片，局長「波波」陳茂波、副局長馬紹祥、地政總署署長甯漢豪同房協主席鄔滿海四人親自上陣拍片，多次重複指「不遷不拆」不可能，力銷「新界東北新發展區，香港人的新市鎮」嘅訊息。
波波喺短片中呼籲各方支持東北發展，反問新界東北發展如果再拖落去，要結婚嘅年輕人去邊度居住？馬紹祥就強調「不遷不拆」實在不可能，再三強調當局會為受影響合資格居民提供原區安置或特惠補償。至於鄔滿海就唔似波波等人發言點到即止，佢喺短片發言時間最長，話如果市區有大量閒置土地，相信港英年代已經可以用嚟發展或興建房屋，當年使乜喺新界發展新市鎮喎。
