城中鏡：胡潤品牌榜 騰訊做一哥

胡潤研究院發布咗《2014胡潤品牌榜》，有二百個最具價值嘅中國品牌名列榜上。最令人矚目嘅莫過於係騰訊嘅成績啦。佢以二千零八十億元嘅品牌價值，爬過咗中國移動同工商銀行，第一次成為「最具價值中國品牌」。唔止咁添呀，佢仲超越百度做埋「最具價值中國民營品牌」。騰訊嘅揸Fit人馬化騰真係飲得杯落嘞！

百度都唔弱架，百度取代咗建設銀行打入北京最具價值品牌嘅前三，而天貓都取代咗娃哈哈打入浙江最具價值品牌嘅前三位。馬雲、馬化騰、李彥宏呢三個IT巨頭，呢一年真係未逢敵手。

騰訊今次就認真威威啦，九八年至先成立，咁快就做品牌一哥，品牌價值年年都升，比舊年仲增長咗一點四倍。工商銀行就冇咁勁啦，品牌價值比上年跌咗百分之十六，暫時守住個亞軍地位啦。

馬雲仲係第一個將三個品牌（淘寶、天貓、支付寶）同時打入胡潤品牌榜之餘，又位列民營品牌十強添。而天貓同支付寶仲係上榜品牌中升幅最大。