政壇：林奮強復出好有火

反對收緊個人遊

林奮強喺研討會上話，香港其中一個大問題係仇內，將客人變成仇人，社會又有咁多白色恐怖，搞到有啲港人拖篋出街都好想將「我係港人」四字刻喺額頭，擔心人哋視佢為個人遊旅客，所以港人必須先要改變呢種心態。佢又用「傻傻哋」三個字嚟形容本土主義，話香港最少有八十萬人都唔係本土人，現時最少七成長者都係外來人，所以最少七成港人都唔係本土人所生，如果香港只係剩番本土人，一定唔會成功。

佢話如果香港要做好旅遊業，一定做到供求平衡，所以要發展。不過，佢話依家喺香港提起發展呢兩個字，市民嘅反應就會好大，以致政府追唔到市場轉變嘅步伐，其實香港鄰近內地，發展機會真係好大，但如果唔積極處理供應不足，解決本港各項硬件問題，唔單止市場、就業受影響，旅遊業都有影響。佢又話原則上反對收緊個人遊政策，因為香港喺一國兩制下，唔應該收緊中國省市人民來往香港嘅政策，相信只要加快做好配套設備咁就解決到相關問題喎。