治病救人最緊要對症下藥,如果醫生一味靠估,分分鐘搞出人命o架。嗱,醫管局管理病歷混亂,醫院斷估冇辛苦,又收到「黃牌警告」喇。

話說本報舊年踢爆醫管局處理問題病歷嘅「黃旗標籤檔案」制度甩漏多多,而且大歎慢板,申訴專員公署其後主動介入調查,結果揭發局方喺提供病歷同核實病歷時有多項不足之處,證實本報嘅報道完全正確,一啲都冇冤枉醫管局。

所謂黃旗檔案,即係公立醫院病人醫療紀錄管理系統一個提醒機制,一旦有人錯誤出示或故意使用他人身份證登記求診,或者發現病人醫療紀錄內個人資料出現重疊或異常,病歷紀錄就會自動啟動黃旗標籤,提醒醫護人員跟進。呢種制度八年前設立,本意係阻截可能出錯嘅病歷送去其他醫院,可惜醫管局冇同時設立病歷核實機制,而且拖拖拉拉,經常拖到病人索取至核實病歷,唔止造成大量積壓,仲隨時影響醫生診症添。

正如申訴專員公署批評,醫管局對索取病歷方式宣傳不足,好多病人唔知緊急情況下可以通過醫生互通資料索取病歷,往往因為等副本而延誤治療。仲有吖,由於當局推廣不力,有私家醫院唔清楚制度指引而轉移病人診症編號,搞到病歷出現「黃旗」;更有病人因為出現「黃旗」,足足等咗五個月至可以申領病歷,簡直係靠害。

老實講吖,醫管局亂象叢生,醜聞多多,管理病歷烏龍百出只係冰山一角咋。好似公立醫院護士人手不足咁吖,局方一味話「增加撥款」、「增聘人手」,結果得個噏字,十年來毫無改善,今日護士與病人嘅比例依然高達一比十一,同歐美先進國家嘅一比六幾乎相差一倍,香港淪為第三世界,問你服未!

係人都知,醫護人員長期不足,工作壓力太大,必然影響醫療質量,亦必然容易發生醫療事故。呢嗱,有病人家屬投訴青山醫院涉嫌人為疏忽,睇漏接受精神科藥物治療病人嘅血糖報告,而病人服藥後幾個月內體重增加幾十磅亦冇人理,結果懷疑因為血糖嚴重超標而導致急性心臟病死亡,冤哉枉也。即係咁,今次醫療事故嘅真正原因仍有待調查,但可以肯定嘅係,如果醫管局唔改善管理,唔增加前線人手,意外睇怕仲陸續有來吖。

其實,醫管局經費年年增加,只要用得其所,又點會搞成咁吖。計太一叮話齋,醫療官僚連管理病歷都搞到一鑊泡,旨意佢哋治病救人喎,不如自求多福好過喇,叮!

第一手消息請下載on.cc東網iPhone/iPad/Android/Windows Phone Apps