立法會議員葉劉淑儀每年暑假都用「匯賢智庫」牌頭搞尖子研習班，今年都唔例外，會開班收約一百名中學生，再搵一班劍橋、耶魯、史丹福等名牌大學畢業生做導師，教授語文同歷史。舊年仲係導師之一嘅葉劉愛女Cynthia葉榮欣，今年銜頭已升級為「匯賢智庫學苑課程統籌」，連請乜嘢老師都係佢決定。

葉劉淑儀（前排右三）今年繼續搞暑期研習班，搵埋愛女葉榮欣（前排左一）做課程統籌。

匯賢智庫已經唔係第一年搞暑期研習班，葉劉話舊年反應唔錯，但今年都係維持收生一百人，希望貴精不貴多。為期八堂學費介乎八百至一千元，佢話自己每年要倒貼八至九萬元，但為咗幫班學生提升語文能力，絕對值得，仲話呢個數買少個名牌手袋已經慳得番喎！

Cynthia做統籌大權在握，葉劉咁快將匯賢智庫放手畀愛女搞，似乎對佢能力予以肯定，唔通葉劉想愛女繼承自己衣鉢從政？

第一手消息請下載on.cc東網iPhone/iPad/Android/Windows Phone Apps