立法會尋日朝早九點正續會，開波唔夠一分鐘，人民力量陳志全就要求主席曾鈺成響鐘點算開會法定人數，響到超過十三分鐘，議員梁志祥匆匆趕到，勉強湊夠法定人數。不過，當工聯會KK黃國健講咗十分鐘左右，就話由於港大社工及社會行政學系講座教授周永新聽日會就退休保障發表研究報告，認為自己嘅動議無迫切性，決定撤回動議辯論不作討論，曾鈺成於是宣布散會，真係皆大歡喜囉！

設計圖片及對白

KK喺會後話人力近兩星期不斷要求點人數，令立會淪為「點鐘遊樂場」，大大浪費時間。佢話退休保障係一個嚴肅嘅議題，擔心個會開開吓又要停低點人數，搞足成朝都係得個吉，因此決定撤回動議，等埋周永新份報告先再算。咁佢係咪早幾日已經決定要撤回動議呢？KK話尋日朝早先決定撤回動議，事前冇同其他建制派商量，強調自己都覺得好無奈喎!

無奈嘅並唔只得KK一人，梁志祥臨時臨急跑入會議廳，話大欖隧道非常塞車，令佢遲咗返立會，點知當佢一仆一碌咁行入會議廳，就有工聯會議員問佢做乜趕返嚟，搞到佢初時都唔明對方講緊乜。佢話如果KK一早肯喺前晚決定撤回議案，咁其他議員就唔使咁慘一早趕返到立會，而佢都唔使山長水遠喺元朗趕出嚟。

第一手消息請下載on.cc東網iPhone/iPad/Android/Windows Phone Apps