經濟不景，內地旅客又大減，本港零售消費業面臨大收縮，不過，有膽識嘅業內人士卻打算趁機逆市拓展業務。太子珠寶鐘錶主席鄧鉅明、「港產陀飛輪」萬希泉創辦人沈墨寧同佢兒子沈慧林（William）合作舉辦咗個腕錶及珠寶展覽，場地正正係太子珠寶鐘錶嘅會所「太子會」。鄧鉅明透露，會所每月都舉行一次展覽：「七月仲精彩，喺彩星中心我哋會有個新會所，大呢度（太子會）一倍。」咁咪即係逆市擴充？鄧鉅明話：「喺我立場，做生意不進則退，要不斷加新元素，最緊要自強不息。」

鄧鉅明話做生意不進則退，所以就算逆市都要有動作。

沈墨寧（左）同兒子沈慧林，父子檔現身腕錶及珠寶展覽。

William亦透露，萬希泉嚟緊將會推出一款特別版手錶，同時又話做生意需要膽量，身邊嘅鄧生聞言即刻講笑：「見唔見我哋心口好多毛？」意思即係夠晒「膽生毛」喎。佢哋兩人合作愉快，既有後生嘅思維，又有老到嘅經驗，逆市出擊冇有怕！

第一手消息請下載on.cc東網iPhone/iPad/Android/Windows Phone Apps