政壇：戴耀廷「雷動」抄舊橋
九月立法會選舉係一場政治攻防大戰，連佔領行動後潛水摺埋嘅「佔領中環」發起人戴耀廷都蠢蠢欲動，成個「軍師」款咁指點江山，最近提出欲號令全體泛民嘅「雷動計劃」，呼籲泛民各派喺立法會選舉時協調，目標係取得議會過半數議席喎。
不過，佢嘅建議一拋出嚟，泛民中人已「唓……」聲四起，建制派更掩住半邊嘴笑，民建聯（建仔）立法會議員梁志祥尋日就話，戴建議嘅一啲做法「我哋一早做緊啦！」寸爆戴耀廷以為自己「發現新大陸」。
梁志祥尋日同傳媒聚會時，被問到點睇戴耀廷提出嘅「雷動計劃」，尤其係戴建議喺選舉投票當日搞民調，喺投票最後階段由義工團隊按所得數據，將選票投畀有需要嘅候選人，講白啲，即係泛民陣營嘅配票行動。梁志祥話佢哋一早已有類似做法，好似喺過往嘅立法會選舉當中，競選團隊都會呼籲支持者投票，但係義工同助選團隊就會留待最後階段先出動投票，目的就是方便配票畀得票可能較低的候選人。
梁志祥：一二年已玩過
梁仲以一二年立法會選舉為例，當時佢出選新界西，大約有一千名助選人員，而建仔喺同一選區有三名候選人，預計大約都有三千票，可以喺最後關頭調動。佢仲話，雖然未必「人人都聽你支笛」，但如有七成人跟隨，已起到一定作用。而建仔一二年就派出三隊，最後亦成功取得三席。梁又估計，如果佢今年九月角逐連任新界西議席，就至少要取得四萬三千票先有望連任︰「冇三萬五（當選）呢支歌仔唱o架喇！」
其實建制配票有先例，但戴耀廷同泛民中人就好似後知後覺、甚至無知無覺添，究竟係雷動定雷打不動呢﹖
