城中鏡：和諧過冬
經歷過去兩年「火」旺，點知踏入猴年又發生旺角暴亂，莫非今年繼續流年不利？香港道教聯合會（道聯會）日前舉行活動，堪輿學家蔡伯勵女兒、通勝編纂人蔡興華都有出席，佢話農曆正月初一係破日，而新曆一月一日又咁啱係破日，立春後則係歲破月，因此係一年內相對較差嘅月份。不過，一年之計在於春，只要上下體恤，冬天就會較為平和喇。
蔡興華話今年冬天會較為平和。
湯偉奇（左）同梁德華宣布將在十八區舉行一連串道教日慶祝節目。
夏敬文（左起）、夏德建同歐陽秀明話舞獅文化與道教息息相關。
道聯會主席梁德華同會長湯偉奇早前舉行記者會，宣布未來多個月會喺十八區舉行一連串香港「道教日」慶祝活動，包括萬人盆菜宴、香港道教日仙真出巡暨儀仗巡遊、「易學圖像」展覽同卦象生活應用講座等，其中蔡興華亦係負責講座嘅專家之一。
講起香港今年運勢，蔡興華話今年春夏火強金弱，秋季金強火弱，形成拉鋸局面，因此有好多變動，上不和、下不睦。不過，「物先腐而蟲生」，佢認為人為嘅力量更加大，又指只要大家互相配合溝通，過咗歲破月後就會開始和諧啲，到冬天就會較為平和。講起唔少港人都家有一本通勝，蔡興華就話，今年整合咗個新版本通勝天文曆算，除咗重組同合併舊有嘅「七政四餘」、「民俗通勝」外，仲加埋教學，更緊貼現代用途。
舞獅與道教息息相關
同場仲有「一代獅王」夏國璋兒子夏德建，同佢阿仔夏敬文、歐陽秀明夫婦，佢哋話舞獅文化同道教都息息相關，因為舞獅嘅人多數拜天后，故天后誕又係佢哋龍獅隊出動之時喇。歐陽秀明仲話，夏國璋創立嘅通善壇亦係道教慈善團體，提供護老院、託兒同腦退化治療中心服務，而今次佢哋亦會捐出一座兩米高太上道祖像作巡遊之用，為推廣道教文化出力。
