假難民扶老攜幼 自由港變聲請港

呢，前日警方又喺赤鱲角機場對開海域截獲二十一名企圖搶灘登陸嘅南亞人蛇，除咗係今年警方喺單一行動中拘捕人數最多嘅偷渡案，而且包括一名三歲女童，成為本年首宗小人蛇個案。更加得人驚嘅係，偷渡船上冇任何救生設備，加上嚴重超載，隨時翻艇。去年敍利亞有名三歲難民命喪大海，伏屍希臘海灘嘅一幕，隨時可能喺香港上演o架。

事實證明，假難民愈來愈猖獗，成年人不斷湧港都唔止，仲要扶老攜幼，直頭當正香港係第二個家，準備落地生根。香港吸引唔到優秀人才，吸引唔到移民港人二代回流，反而吸引假難民蜂擁而來，都咪話唔諷刺。再咁落去，香港遲早變成「難民港」及「聲請自由港」都似。

唔係靠嚇o架，入境處數字顯示，非華裔非法入境者由一二年全年嘅七百五十六宗，迅速增至去年嘅三千八百一十九宗，升咗足足五倍。踏入今年，問題進一步惡化，一月份已經有四百一十六宗。淨係水警西分區咋，元旦至今不足三個月，截獲嘅非華裔人蛇已達九十三人，接近去年一年嘅總和，問題究竟惡化到乜嘢程度，可想而知喇。

可以見到，假難民大軍壓境，何止人數愈來愈多，犯案手法仲愈來愈狼死添。油麻地日前發生震驚全港嘅便利店血案，一名越南裔人士疑盜竊不遂，居然以利刀插到店東危殆。至於其他罪案，好似販毒、劈友、非禮、恐嚇勒索等惡行更加係無日無之。係人都知，港府中門大開，假難民愈來愈多，萬一有恐怖分子混入香港，咁就大件事嘞，香港遲早成為恐怖組織基地，莫講話市民提心吊膽，外國政要一樣望港生畏。被視為「南亞兵團之父」嘅黑幫和勝和前坐館上海仔唔否認掌握疆獨等恐怖分子消息，究竟係乜嘢意思，畫公仔唔使畫出腸喇啩。

一句講晒，禍福無門，唯人自招。港府無知無覺無神經，中門大開，加上司法機構助紂為虐，假難民唔嚟食大茶飯就笨嘞。話時話，今日屈蛇好似家庭旅遊咁，一家大小，拖男帶女，第日隨時帶埋寵物偷渡添吖，叮！