政壇：搞搞政：本土搶票鬼打鬼 楊岳橋難坐多屆
立法會新界東補選結果對九月大選極具參考價值，香港研究協會昨公布新界東補選跟進民調，發現原來本土派梁天琦嘅選票中，有唔少係公文袋嘅選民，佢哋用腳投票，令九月立法會楊岳橋「再坐一屆」嘅可能性存疑，分分鐘要做最短命議員。睇番整個分析，公文袋九月選情真係危危乎！
根據有關調查，四百一十名受訪新界東選民中，三成半人投票係為懲罰某些候選人、政團或派別嘅立場。至於投畀本土民主前線（本民前）梁天琦嘅受訪者，有兩成半人係人力或社民連支持者，但意外嘅係有一成九人屬公文袋支持者，顯示有支持者不滿楊岳橋或嫌棄公文袋立場故轉投梁天琦。
有分析指，隨着激進本土派崛起，加上年輕人開始嫌人力同社民連「老餅」兼唔夠激，跌票實屬必然，至於得把口嘅公文袋都緊隨其後成箭靶，如楊岳橋同喺九龍東接替梁家傑嘅飛機師譚文豪都可能現暗湧。至於有意再戰港島直選嘅陳淑莊，以及競逐連任新界西嘅郭家麒，因同區分別有唔夠激嘅工黨何秀蘭同李卓人「墊底」，而九龍西毛孟靜本身已食正「本土」條水，料陳、郭、毛三人可穩守議席。
