政壇：中環泳棚游午水 CY鬧國際笑話
特首梁振英（CY）早前提出喺中環興建泳棚或釣魚區，畀上班族午飯時間可以游泳或釣魚，引起各界熱議。就連英美傳媒都紛紛報道此事，質疑維港水質受嚴重污染，是否適宜游水同釣魚，又提到食飽飯是否適宜游水，仲認為喺中環買飯已經排隊需時。CY今次真係鬧出國際笑話！
田北辰為咗測試午飯時間有足夠時間游水，要食蕉當飯。（互聯網圖片）
不過，遠在北京出席兩會嘅全國人大代表兼立法會議員田北辰（田二少）竟然盲撐CY嘅建議，佢喺社交網站上載照片，指自己親身測試過一小時內是否足夠時間食飯兼游水，結果「係得嘅」。不過，原來所謂「係得嘅」，係要游水後先進食，仲唔食飯改食生果，兼且唔沖涼先至夠時間游水。喺泳池游完水唔沖涼還勉強可以，但落維港游水唔沖涼就相當邋遢喇！
田二少解釋，佢係喺北京飯店泳池內游水二十分鐘，之後無沖涼，抹乾身就去飯店嘅餐廳食生果當飯。所以打工仔要喺午飯時成功游泳，最重要係公司附近有泳池，游完唔沖涼抹一抹，仲要食自攜食物。話明係午飯時間，如果為咗游水連飯都唔食，莫非真係「游水游餐飽」？
