政壇：李貞駒踏遍英倫反惡法
過往華人移民海外，好多都係埋首工作、不問世事，但呢種現象已開始改變。英籍華人李貞駒（Christine）同梁日昌最近夾埋幾位朋友成立咗名為「香港英籍華人網絡」嘅組織，聯繫有英國國籍嘅香港華人，善用自己嘅選票或參政權利，發揮公民力量爭取權益。
李貞駒（右）同身旁嘅梁日昌合作成立組織，聯繫英籍香港華人發揮公民力量。
雖然呢個組織開宗明義係鼓勵華人參政，但身為主席嘅Christine原來起初卻係不問政事之人。
話說Christine係新界人，幾歲大就隨家人移民英國，佢同當地好多華人一樣，唔太理英國嘅公共事務。不過，○五年時佢發現英國正制訂一條針對移民嘅法案，當中提到倘若外來人士訪英簽證不獲續批，則會撤銷喺英國本土上訴嘅權利，要返回原居地重新申請。呢條法案一旦通過，對急需外勞嘅華人餐館同埋華人留學生都有影響。
當時有關法案已通過二讀，但華人社區卻懵然不知，Christine於是走遍英倫三島向華人社區講解法案，仲將意見轉交國會議員，成功迫使法案作出修訂，自此佢就好支持華人參政。佢又提到英國全國地方選舉、英國脫離歐盟嘅公投快將舉行，呼籲在香港嘅英籍華人屆時務必投票以盡公民責任。
