民生書院九十周年校慶，專程邀請校友同師弟妹傳授領導之道。中電企業發展總裁莊偉茵（Quince）仲首次公開學生照，力證自己由幼稚園已經同書院結下不解緣。今次返母校演講勾起咗Quince唔少回憶，佢自爆小學成績一般，考過全班尾二，更試過英文同數學唔合格而留班添！不過，佢笑稱因為年尾出世先會係咁，仲話留班一年後就再無問題嘞。

莊偉茵（中）與丈夫黃楚權（右）、大仔Julian都讀過民生書院。

Quince連學校制度都記住，抱怨副科唔合格要犧牲暑假補課，但佢就話畢業後睇法唔同咗，仲感謝書院喺八十年代已經聘請來自北京嘅老師教普通話，令佢嘅普通話起步比其他人早添！原來佢同丈夫黃楚權係同班同學，大仔Julian都喺書院讀過三年，難怪一齊出席撐場喇。Quince最後仲寄語學生要心存感恩，又即場多謝丈夫為照顧兩個兒子而裸辭，令佢可安心發展事業。

第一手消息請下載on.cc東網iPhone/iPad/Android/Windows Phone Apps