潮語「頹飯」有兩個解釋，其中較多人用嘅就係解碟「飯」係下價嘢，或者種種原因所以好難食，令人食嘅時候感覺「頹喪」。另一個解釋，就係有時因為一個人地位卑微，或者生活頹廢到無朋友或情人陪食飯，所以好「頹」地食飯，呢啲都可稱為「食頹飯」。

香港地，乜嘢係最緊要？經濟？民生？民主？法治？咪kai啦……如果香港人真係覺得呢啲嘢重要，一早就搞咗革命，起義推翻特區政府。又或者，七一遊行就唔會來來去去都係嗰三幾十萬人，而係二百萬人佔領港島，逼政府順應民意，點會容忍一個民望屢創新低嘅政府管治香港？

香港今時今日之所以搞成咁，係因為香港嘅核心價值，跟本就唔係咩民主法治人權，呢啲西方文明所謂嘅普世價值，而只係「搵食」，為兩餐乜都肯制。最近有朋友指出，如果能夠證實到真正普選能夠令樓價下降，人人有飯食，你估中央會唔會好似依家咁明目張膽扼殺香港民主發展？不過，依家嘅香港，就算有得食，都肯定無以前咁好食。租金加埋食材貴到飛天，普普通通茶餐廳食碟飯都唔平，分分鐘半百銀錢都只係食到「頹飯」一餐，你話情何以堪？

近年冒起多個「頹」字頭嘅潮語，「頹飯」係其中之一。「頹」字嘅意思係「頹廢」、「頹喪」，係形容一個人提唔起勁同垂頭喪氣嘅心理狀態，「飯」就真係一頓飯咁解。

「頹飯」多數都係一個人無錢又孤單嘅時候食，大時大節食「頹飯」就更陰功。「頹飯」起初係啲毒男，因為經常單拖食飯，求其一餐而感覺「頹廢」，以至有咁嘅說法。最近據聞中文大學其中一個飯堂，推出「頹飯」供學生選擇，嗰啲真係嚟自窮苦家庭，或隻身嚟香港留學無人無物嘅「頹」學生，見到「頹飯」兩個字，可能未食落肚都知箇中滋味。

香港地貧富懸殊喺世界都數一數二，有啲人連兩餐都未必搞得掂。大家又知唔知全港最「頹」嘅「頹飯」喺邊食到？嗰個地方就喺九龍蝴蝶谷……我食過。至於係咩地方有咩食？自己上網查吧！

第一手消息請下載on.cc東網iPhone/iPad/Android/Windows Phone Apps