政壇：被狂噴口水吳得掂O嘴
策略發展委員會咁多年嚟一直有「口水會」稱號，呢個稱號真係唔係浪得虛名，策發會雲集政商界猛人，次次都用幾粒鐘時間開會，但班委員提出嘅建議一係笑死人，一係「阿媽係女人」。上次開會主題係講教育政策，有人竟然建議政府安排國際學校嘅外籍學生，同本地學生「共度周末」，等本地學生可以全日用英語對話，以增強語文能力。如果真係成事，相信唔少男學生都會踴躍報名。
設計圖片及對白
策發會再次證實一個道理，一班叻嘅人走埋一齊，得出嚟結果唔一定係驚天地、泣鬼神。除咗有委員建議本地學生同外籍學生「共度周末」外，有委員仲有創新建議，話學生成長時應該有專人輔導，但後生仔未必個個願意聽人訓話，又話政府可以拍套電視劇，內容講青少年點樣規劃人生，軟性教育青少年。甚至有委員認為，為增強學生自信心，中學期間唔應該將學校分三等級（Banding），應該撈亂晒一齊教，咁先唔會有標籤作用。
雖然以上建議比較奇怪，但有啲都幾實用，例如建議政府資助大學生海外留學一年，而唔係一個暑假咁少，亦有人希望大學生畢業後還貸款，可同薪金比例掛鈎。
老實講，若果相關建議要做晒嘅話，睇嚟教育局局長吳克儉都幾大煲，尤其喺佢由國民教育風波、電子書，以至最近嘅幼稚園學額問題，樣樣都搞到一鑊泡咁，如果唔係，佢點會被嘲為「吳得掂」吖！
聽聞當日聽完呢啲建議，吳得掂都O晒嘴。當佢已經畀啲口水花噴到水浸眼眉嘅時候，點知佢回應時仲好笑，佢話為咗激勵學生充滿希望，教育局網站將會上載多個「真實勵志個案」，供學生上網閱覽。原來教育局認為，有學生會無啦啦上教育局網站睇吓有咩勵志個案，教育局真係冇得頂呀！
