政壇：大老倌盼維持戲曲傳統
日前西九文化區戲曲中心搞咗個講座，由粵劇大老倌羅家英同著名京劇大師尚長榮對談《不同行當的成名之路》，吸引數十名戲迷入場分享。所謂「行當」係指人物角色，按性別、性格同地位等特徵，透過化妝同服裝等方式予以區分，例如生、旦、丑等。擅長扮演關公嘅家英哥笑笑口話，當年佢入行做文武生，係因為佢天生身材靚同聲靚喎！
尚長榮（右）與羅家英（左）盡情暢談近兩小時。
但佢感慨話近年好少人學丑角，因戲份少、扮相唔靚，舞台上只能相繼出現靚仔扮相嘅曹操同楚霸王，佢直言好失落。佢又擔心日後要搵齊人做場《三國演義》都好難，因為個個爭住做小生，已搵唔到人做張飛、關公同曹操喇！佢又趁機叮囑擔任主持嘅西九文化區管理局表演藝術行政總監茹國烈，要立足傳統，千祈咪玩花臣。
獲獎無數嘅尚長榮擅扮花臉，將曹操、楚霸王等歷史梟雄演得淋漓盡致，對談時佢傾得興起，幾度曹操上身，哼唱起來，台下戲迷聽得入迷，拍爛手掌。尚長榮都話傳統戲曲應回歸基本功架同唱功，各行當嘅劃分源於生活，並經過長年累月錘煉，此乃戲曲絕妙之處，唔可以因為要創新而走火入魔。
