政壇：搞搞政：助理代報瑣碎數 田北辰唔使煩
根據《立法會議員申請發還工作開支指引》，立法會議員可獲發還因履行立法會職務而須付出的開支，行政管理委員會聘請核數師，每年為全體議員進行核數工作，包括審查議員申領開支時有否依照秘書處指引、辦事處申報事項是否合理等，杜絕議員借申報制度欺騙公帑。據了解，今年度嘅審計監察已展開，議員們本來要喺下星期一前交出審計監察報告，而秘書處更舉辦講座教啲議員助理點填份報告，但近日秘書處決定將死線延長多一個星期，睇怕都係因為唔少議員唔識填份報告。
設計圖片及對白
田北辰話已將所有瑣碎事務交畀議員助理處理，所以唔知幾時要交報告，但佢就猛呻秘書處要求議員喺每一張收據上簽名，搞到依家每日都有一大疊單等住佢簽，名副其實簽名簽到手軟。
何俊賢就話雖然份表格都幾難填，但佢就比較擔心審計師去佢啲地區辦事處進行突擊檢查，到時要搵番開公數買嘅物資出嚟都咪話唔麻煩。有多次審查經驗嘅馮檢基就話有個制度雖然係好事，但就搞到佢頭都痛埋，因為有時買咗啲物資唔知放咗去邊，次次審查都要好似尋寶咁搵番晒啲嘢出嚟喎！
