政壇：張樹槐挑戰垂直馬拉松
人稱「水哥」嘅恒生銀行傳訊及企業可持續發展總監Walter張樹槐係長跑好手，至今已完成超過四十個馬拉松賽事，近年佢又開始向「高度」挑戰，就係參加跑樓梯比賽喇！
水哥希望今年跑ICC嘅成績，可以突破舊年嘅二十分鐘。
早喺○六年，水哥已參加國際金融中心（IFC）嘅跑樓梯比賽，佢話當年第一次跑冇乜經驗，又唔熟悉環境，自己都有啲擔心，所以留住力咁跑，跑完亦唔覺辛苦。舊年佢轉戰全港最高嘅建築物環球貿易廣場（ICC），用咗大約二十分鐘就征服二千一百二十級樓梯，仲話留咗力添！今年佢再接再厲，希望可以打破舊年嘅成績，最近已積極備戰。
比起馬拉松，水哥話跑樓梯對爆炸力嘅要求更高，但過程就冇馬拉松咁辛苦。佢話親身跑上一百層高樓，從高空俯瞰香港嘅美麗景色，已令佢好開心；佢仲講笑咁話，仲要係免費添。
