政壇：樂做副局許曉暉唔跳船
財經事務及庫務局副局長梁鳳儀前日話即將迎接人生第三次轉型，以致由上屆政府留任至本屆嘅副局長，只剩民政事務局許曉暉同運輸及房屋局邱誠武。政府以前曾計劃增設文化局，並有傳由許曉暉擔任該局局長，如果係咁，佢咪一樣可以轉型囉？
許曉暉（右）同保良局主席鄭錦鐘（左）出席親子飯堂啟動禮。
許曉暉之前由銀行界轉型到政府做副局長，本來仲有傳話佢有機會再轉型做文化局局長，可惜政府建議嘅架構，因為立法會拉布所以無通過。不過，佢尋日出席活動後，就話佢做局長只係傳聞啫，佢都唔知有呢件事。咁有冇諗過辭職呢？佢就話冇諗，因為仲好熱衷依家嘅工作，又話文化、社企及體育等都係民政事務局要負責嘅事。
