政壇：獻詞甩轆業餘田總認錯
尋日同大家講過，康樂及文化事務署署長Betty馮程淑儀早前應邀於渣打馬拉松比賽場刊寫英文獻詞，但被人發現文中至少有五個錯處，康文署事後查證核實後發現其實同Betty無關，只係香港業餘田徑總會付印文本出現錯漏，渣馬籌委會主席高威林尋日再證實呢個說法，正式去信Betty對此事表示歉意。真相終於大白，原來一切只係誤會。
據聞呢封道歉信上款抬頭指明係畀Betty，並以高威林名義發出。高威林喺信中開宗明義話對佢哋付印文本時出錯向Betty道歉，又話自己曾檢視整個過程，話起初獻詞最後核對版本交予付印時係正確無誤，同署方將Betty獻詞傳畀佢哋時係同一版本，然而付印工序出錯，喺未有事先通知嘅情況下重新輸入部分內容。
高威林其後宣布「補鑊」措施，首先將Betty獻詞嘅正確版本上載至互聯網，又話三千份包括Betty正確獻詞版本嘅場刊，會喺本周五嘅歡迎酒會同埋比賽當日喺貴賓攤位派發。高威林喺信末再次由衷地對Betty同康文署造成任何尷尬表示歉意，又保證已採取每個可行步驟去糾正此事。
