過幾日就係情人節，今年仲同元宵佳節同日，咁浪漫嘅節日，注定同少膽虫呢啲中年麻甩佬無緣，好衰唔衰仲要撞正嗰日放假，一條友都唔知點過。諗到呢度，少膽虫不禁「唉」咗聲。

「虫虫，做乜唉聲嘆氣呀？」淫賤黎突然出現，差啲畀佢嚇到嗌出嚟，好在少膽虫臨危不亂︰「無，諗緊點幫《爛果》節流啫！」「真係辛苦晒喇！」淫賤黎笑笑口咁問︰「係喎！十四號嗰日你有冇嘢做呀？」原來想叫我銷假，唔怪得咁好口啦！

「腦細叫到，就算有嘢做都銷假返工啦！」少膽虫擦鞋功夫簡直世界級。「邊個叫你返工啫！」淫賤黎擺出一副含羞答答嘅樣︰「人哋想約你玩啲刺激嘢之嘛！」呢句真係恐怖過鬼古，少膽虫嚇到面都青埋︰「腦、腦細，刺激嘢我唔啱o架！」

「怕咩啫？我想約你一齊出街玩Free Kiss咋！」少膽虫真係估佢唔到︰「唔係啩！幾十歲人玩呢啲？」淫賤黎點會罷休︰「唔使怕羞喎！不如等我同你實習下先啦！」「唔、唔好…嗚呀！」

第一手消息請下載on.cc東網iPhone/iPad/Android/Windows Phone Apps