塘鵝今季改名後推出新吉祥物Pierre，惟驚嚇造型嚇窒小球迷。球會見Pierre得不到球迷支持，惟有出招令他「受傷」，要做整容手術執靚個樣，才與大眾見面。連吉祥物都傷埋，球隊昨日作客速龍就以101:108輸波，慘遭兩連敗。

Pierre（左）造型得人驚，搞到身旁嘅細路喊晒口。

塘鵝（右）作客速龍又輸。（美聯社圖片）

NBA常規賽周四秩序

周二戰果

塘鵝吉祥物Pierre在季初亮相時，巨型鳥嘴驚嚇度爆燈，被球迷怒插「樣衰到得人驚」，不時成為惡搞改圖的對象。Pierre曾向年輕球迷打招呼，嚇得對方後退幾步，與球迷合照時又弄得小孩狂喊。美國體育評論網《Grantland》在今年1月稱收到消息，指球會將會重新設計吉祥物的造型，希望「整容」後會比以往順眼。

認真到搵護理師解釋

球會昨日發聲明，稱Pierre打波時不慎撞到籃框支架的軟墊，鳥嘴受損需要開刀做手術。聲明雖然別出心裁，但難掩會方終於承認Pierre樣衰的事實。球會風趣地請新奧爾良市動物園的護理師解釋受傷原因：「我哋經常見到塘鵝撞到硬物後，出現腦震盪、鳥嘴或者眼睛受傷嘅問題。我喺動物園都有幾隻塘鵝，情況同Pierre好相似。如果護理得當嘅話，佢出院時會更強壯。」言下之意是Pierre將會全面大執！塘鵝稱會在今日跟進Pierre的狀況，應該可趕及在周五開始的全明星周末「復出」。

吉祥物都冇埋，塘鵝昨日雖有第6人泰拉基伊雲斯（Tyreke Evans）攻入全場最高的23分，卻無法扭轉乾坤，反而幫助速龍結束兩連敗，塘鵝連輸兩場後周四會作客公鹿。