呂品韜雖敗猶榮 硬膠官絕對垃圾

香港健兒呂品韜孤軍遠征索契冬奧，首輪初賽已經遇上兩名三甲選手。你知啦，香港地處亞熱帶，發展冰上運動本來已經先天不足，加上港府支援欠奉，健兒基本上係自生自滅。但呂品韜初生牛犢不怕虎，奮勇拚搏，喺芸芸高手之中得到第五位，雖然最終未能進入決賽，但成績已係難能可貴，你話係咪雖敗猶榮，值得大家一再鼓掌先！

不過咁，返到香港，呂品韜百般滋味在心頭，慨嘆港產官僚虐待運動員，居然連隊醫都唔准隨行，卒之搞到佢腳患復發都無人治理，帶傷上陣影響表現，仲要硬住頭皮向中國國家隊借膠布鎮痛添。健兒負傷，港產官僚連一塊膠布都無法提供，唔怪得成日畀人話係硬膠官啦！

最好笑嘅係，港協暨奧委會耍出一招「國際太極」，一手將個波拋到俄羅斯，話香港隊之所以冇隊醫，只怪主辦當局規定嘅代表團名額已滿喎。咁就愈解愈糊塗，愈解愈混帳喇。實情係，號稱「爆滿」嘅香港代表團官多過兵，全團七人大都係隨行官員，而且全程失蹤，淨係喺電視台訪問時現身一次咁大把。隨團官員與其無所事事鳩佔名額，點解唔騰個位畀隊醫呢？比賽冇隊醫等同作戰冇軍醫，簡直攞人命較飛，叮！

呂品韜就講得啱啦：「正常來講，我代表香港比賽，佢哋應該會來探望一下，詢問備戰情況吧，但最終連關心一下都冇！」素知港產官僚支持體育得把口，但勢估唔到，家陣連探班呢啲門面工夫都唔做。太一叮不禁思疑，班體育官僚一個二個感染咗前朝貪曾爵士鋪遊埠癮，名為隨團助戰，實則趁機遊山玩水。

冇計啦，香港體壇係咁o架啦，健兒仆心仆命，官僚淨係識抽水，每逢運動員取得好成績，佢哋就蜂擁而上，爭住向面上貼金。一講到支援運動員咯喎，就一於闊佬懶理。講起都醜怪，香港到今時今日都未有標準滑冰場，運動員被迫風塵僕僕返內地練習。咁都未算最慘，睇番前港將韓月雙四年前代表香港參加溫哥華冬奧，當局連基本設備都唔肯提供，搞到佢要着舊鞋、戴爛頭盔上陣，為咗慳錢，惟有靠自己帶去嘅即食麵飽肚。

事實再次證明，香港運動員絕對唔係垃圾，主管運動嘅官僚絕大部分係垃圾。運動員值得一讚再讚，硬膠官必須一鬧再鬧，再唔增撥資源支援健兒，繼續齋噏「振興體育」，小心太一叮叮爆你個鎯鎯，叮！