城中鏡：蓋茨自爆有鋪洗碗癮
因乜事榮膺「全球首富」嘅蓋茨都要晚晚走去洗大餅？微軟創辦人蓋茨周一出現喺社交娛樂網站Reddit「任你問」(ask me anything)環節，被問到佢有啲乜嘢好鍾意做嘅事係冇人估到嘅呢？佢就話：「我晚晚都洗碗，雖然其他人會自告奮勇想幫手，但我就係鍾意自己嗰套洗碗嘅方法。」
蓋茨
每個人都有自己嘅興趣，勢估唔到佢有鋪做家務癮。不過，鍾意親力親為嘅佢，一啲都唔孤單，源自博客A Michelle Moment嘅潮語Dishwasher Packing Obsessive Compulsive Disorder（DPOCD），就係用嚟形容「患者」堅信自己擺碗碟技術一流，空間運用得最好，唔肯畀人幫手擺嘢入洗碗機，蓋茨咪係呢類人囉。
「任你問」嘅另一個問題，就反映到蓋茨幽默嘅一面。問題係咁嘅，「你會怎樣生產新一代安全套」？蓋茨答得認真，以佢同老婆命名嘅基金「蓋茨．梅林達基金」，喺十一月由八百一十二個新奇安全套設計方案中，揀出十一個批出資助，希望可以研製出一種令男士覺得戴得舒服嘅新一代安全套，被問到比賽進展，蓋茨就好風趣咁話呢個係敏感話題，好多男人都唔鍾意依家嘅設計，相信若研發到令佢哋接受嘅款式，會有助抑制愛滋病感染。
