潮籍商界日前舉行團拜，逾百「家己冷」喺上環總壇歡聚一堂。同場講起耗資十億元興建嘅大埔洞梓慈山寺裝有超級防禦設施，包括電網圍封、防彈爆破牆壁及防彈門窗，非常神秘。有份籌建慈山寺同青銅觀音像嘅潮屬社團總會前主席莊學山透露，慈山寺咁嚴密嘅布防，目的係為超級貴賓而設。邊個係超級貴賓？原來係斯里蘭卡總統拉賈帕克薩（MAHINDA RAJAPAKSA）。

耗資十億元興建嘅大埔洞梓慈山寺，裝有超級防禦設施。

莊學山望港人馬年多團結，少爭拗。

張成雄（左）同陳幼南齊齊向港人拜年。

莊學山話早前斯里蘭卡總統曾送贈一批佛教聖物畀慈山寺，若然對方日後到訪，當然要提供「一級保護」，萬一總統有乜差池，真係擔當唔起喎。佢又透露，寺內早前曾發生一場小風波，話說寺方發現地台鋪得唔平，令漿水滲出，幸好近日已完成重鋪，等法師擇好吉日，可望喺今年內對外正式開放。唔知屆時會否邀請斯里蘭卡總統出席開幕禮呢？

當日包括潮屬社團總會主席陳幼南、飲食界張成雄、珠寶業界胡劍江等「潮人」到場，又請咗同為「潮人」嘅食物及衞生局局長高永文同發展局局長陳茂波出席。高永文大晒流利「潮語」同鄉里拜年。馬年經濟市道都係團拜熱話之一，張成雄話睇好內地經濟增長平穩，香港都會繼續受惠。

第一手消息請下載on.cc東網iPhone/iPad/Android/Windows Phone Apps