香港特區政府爆響口預計，二○一七年訪港旅客有七千萬人，到二○二○年，更會突破一億大關，當香港廢柴政府唔做嘢時，有立法會議員倡議開徵陸路出入境稅，作為愛國愛港的本地香港人，唔舉腳贊成，係會畀雷劈的！

家吓！每年訪港旅客中，超過二千萬人係「唔過夜」的（即日閃走），而多數係大陸內地人添！呢班蝗蟲式出入邊境者，大多是「走私」帶運水貨嘅違法壞分子，但中港政府隻眼開隻眼閉，任由港深「同城化」，所以，徵收每次過關一舊水，主要打擊的唔係旅客，而係嗰班「非法走私疑犯」。

記得早幾年前，我哋搭飛機返大陸都要畀甚麼「機場建設費」啦！去外國也要付乜乜入境費啦！所有名目都係亂作的，主要係多筆收入而已！看！如果有七千萬人來港，每人一百，呢筆錢可讓香港增設幾多福利呢？或每人可派糖一千啊！

真正來港遊玩的旅客，又點會差一百元便阿芝阿佐吖！主要係隔咗一群破壞香港人生活安寧的違法蝗蟲而已！早就應該要咁做啦！最慶的，由前政府高官葉劉淑儀爆料，話十多年前，香港政府曾研究過徵收陸路稅，但因「執行困難」，所以放棄咗喎！證明由老董至貪曾都白逗人工，唔理香港福祉嘅cheap精。喂！難就唔做，唔怪之得貪贓枉法、坐遊艇去拜山的便做到足啦！易嘛！

文首，我話愛國愛港嘅本地人都要撐徵費動議，係因內地官媒《人民日報》話大陸人來港學懂了文明，嗱！香港日趨大陸化了，請佢哋去法國學品味，美國學民主、日本學禮貌吧！為咗中國好，佢哋唔好嚟香港啦！好易學壞o架！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps