新一輪政黨整合潮已經展開，新民黨同公民力量今日正式宣布結盟。之前有傳兩黨結盟後，新民黨副主席「田二少」田北辰會喺新界西轉戰新界東，但田二少就私下同人講「親情重要啲」，唔會去新界東同大佬、富貴黨黨魁「田少」田北俊互撼，反而心思思想試選超級區議會議席。

設計圖片及對白

雖然田氏家族唔使內鬥，但新界鄉議局最近籌備組黨，事實上已對田少步步進逼，始終田少今屆選舉都係靠上水鄉事委員會主席侯志強過票。田少估計鄉事派喺新界東最多有一萬五千票，最多只會被撬走佢二、三千票，但鄉事派同樣會撬走建仔、工聯會嘅鐵票，到時大家票源齊齊分薄，比例代表制下無話邊個唔着數，反而有可能益咗泛民主派。不過，田少咪忘記，建仔兩條隊都過四萬票，就算唔見幾千票都夠贏有凸，但佢唔見幾千票就隨時玩完喇!

面對左右夾擊，田少都諗定「Plan B」，講明積極考慮一嘗空降香港島，事關要同時走勻全個新界東一啲都唔簡單，而香港島選區就細好多，佢又住正喺山頂，去邊都非常方便。不過，該黨劉健儀喺今屆選舉空降香港島已一嘗滑鐵盧滋味，唔通田少唔怕重蹈覆轍，令議員生涯畫上句號？

第一手消息請下載on.cc東網iPhone/iPad/Android/Windows Phone Apps