政壇：袁彌明參選寸爆馮煒光
泛民主派內訌風波未平，繼以人民力量成員為首嘅「佔中後援會」，上星期趁白鴿黨就「佔領中環」行動舉行誓師大會乘機踩場後，堅持「公民提名」嘅人民力量袁彌明尋日亦正式參選南區區議會海怡西補選。該區因為原區議員馮煒光辭職出任政府新聞統籌專員（IC）而出現嘅空缺。
設計圖片及對白
承諾對選民從一而終
今次袁彌明捲土重來，除獲立法會議員陳志全、梁國雄同范國威等自稱「進步民主派」嘅盟友撐場外，袁彌明更公開向選民發誓，承諾一旦當選，兩年任期內一定唔會過檔政府出任公職，言論擺明衝住白鴿黨同新民黨而來，事關兩黨先後有黨員參選後加入政府。
尋日報名參選嘅袁彌明劈頭就翻對家舊帳，炮轟上屆參選海怡西嘅馮煒光同新民黨施俊輝先後拋棄選民同「娘家」，過檔政府出任IC同教育局政治助理，佢承諾會對選民「從一而終」，絕對唔會「出軌」投靠政府，或當選民係「用完即棄」嘅工具咁話。其實唔使袁彌明發誓，相信以佢同政府嘅關係，連任幾多屆都唔使擔心會食言，但佢目標只係取得最多三成選票支持，似乎呢個誓言冇乜機會實踐喇！
不過，已經報名參選嘅新民黨陳家珮同「積極考慮參選」嘅白鴿黨「單雞」單仲偕又夠唔夠膽發誓唔會背棄選民呢？陳家珮話參選得就預咗「嫁入」海怡西，若果選民需要佢宣誓以表心迹，佢唔介意咁做。而單雞亦好有自知之明，坦言政府唔會搵佢過檔，所以根本冇需要發誓。原來參選區議會唔係鬥政綱，而係鬥專一、鬥發誓，承諾完成議員任期咁基本都可以當成賣點，真係得啖笑。
