政壇：搞搞政：有時做埋社署角色 黎年都想去申訴

申訴專員公署年報早前已公布，黎年尋日循例到立會解畫，有議員質疑公署辦事效率，問點解公署每年最少有千幾宗投訴個案無法跟進。黎年聽到後隨即苦笑，坦言有時啲投訴好難跟進，有啲係一堆文字、一堆剪報，似係表達意見多過投訴，部分市民仲隔幾日就「申訴」，反問各位議員都應該收過類似投訴，無理由唔明白喎!

黎年又話近年多咗公務員向公署投訴，例如啲公務員投訴上司對自己嘅表現評分過低，不滿上司調自己坐第二度，但公署根本無權限去處理呢類問題，所以只能愛莫能助。佢講講吓，仲大爆公署有時要做埋社會福利署嘅角色。

市民投訴按掣如親手燒母

曾經有市民母親過世後火葬遺體，該市民就投訴火葬場嘅食環署職員逼佢「按掣」將棺木送入火爐，感覺猶如自己親手燒死母親。黎年話遺體火葬嘅正常程序確實由遺體嘅親人「按掣」，但又唔可以漠視市民投訴，惟有約雙方調解，食環署人員解釋火爐內部仲有工作人員最後「按掣」點火，所以該市民唔算直接將母親送入火爐火化，嗰位市民聽完即時解開心結。

跟住議員何秀蘭就問佢離職後，點確保下任專員繼續持平公正？點知佢四両撥千斤，聲言權力就喺議員手中，只要立會全體三分二議員通過，就可踢走個專員，寸到何秀蘭應一應。