城中鏡：再唱婚宴情歌黃進達冧爆老婆
廣東社團總會青委會日前舉行十周年晚宴，城中青年團體核心成員歡聚一堂，而全晚氣氛最高漲，都係青委主任Jason黃進達再次上台高唱早前婚宴上嘅情歌，夠晒浪漫。
黃進達（右）即興高唱情歌，新婚太太陳婷婷（左）冧爆。
楊華勇（中）為健康着想戒酒，身邊好友都深表支持。
王紹恆（右）同香港青聯副主席吳傑莊言談甚歡。
平日內斂嘅Jason當晚忽然上台高唱情歌《唯獨你是不可取替》，呢首歌係佢早前喺自己婚宴上曾唱過一次，今次再Encore，全因台下有新婚太太陳婷婷在場，婷婷又驚又喜，喺友人推動下索性走上台獻花。除太太之外，任職跨國銀行嘅細佬黃進德及當見習律師嘅妹妹黃康莉都去捧場，進德同康莉都話專注自己工作，無意投身家族旅遊生意，話交晒畀大哥打理喎！
楊華勇戒酒唔關「人」事
廣東社團總會主席KK王國強同佢細仔Rex王紹恆都有幫手籌備晚宴，Rex嘅落力程度不下於爸爸。讀建築出身嘅Rex三十歲出頭，係富二代中少有「筍盤」，雖然KK曾請纓想介紹女仔畀佢識，但Rex話想事業有成先至拍拖。
轉頭又見到菁英會榮譽主席楊華勇拎住杯橙汁，原來佢戒緊酒，連平時最愛嘅紅酒同茅台都要暫時擺埋一邊。忽然戒酒，莫非想努力「造人」再做爸爸？佢笑言「造人」順其自然，但戒酒係為健康着想，清吓腸胃。
