政壇：圍政總抗爭 發叔收兵？

其實，發叔個動議喺泛民主派唔支持同分組點票嘅情況下，的確好難通過，再加上工聯會又考慮一致支持政府，所以發叔嘅修訂動議通過嘅機會就更加渺茫。唔知係咪呢個原因，據聞鄉議局今日會改變早前嘅計劃，雖然照樣於中午集合各村民喺立法會門外示威，並向各黨派議員同政府有關部門遞信，但之後就會和平散去。聽聞咁做係因為鄉議局部分成員擔心村民聽到修訂動議嘅投票結果後會情緒失控，所以話表達過意見就算喎！

與環團午宴告吹

此外，發叔尋日本來約咗一批環保團體午宴，預料會面之間所討論嘅話題都係離唔開大浪西灣呢件事，但會面最後告吹。有環保團體話，等今日議案投票後再講，而發叔就話，可能係啲團體擔心同佢哋見面，角色有衝突喎！不過，其實係咪雙方都知道大局已定，所以覺得見嚟都嘥氣呢？

話說回頭，喺鄉議局一方嚟睇，大浪西灣呢件事只係稍輸一仗啫，未來最重要嘅工作都係去喝停政府，以免其他「不包括土地」再納入郊野公園範圍。再者，鄉議局今次所做嘅一切經已充分表達咗佢哋嘅訴求，加上發叔話明立法會唔通過佢嘅動議，就唔排除提出司法覆核，政府以後要再搞餘下嘅幾十幅「不包括土地」，相信會有一定難度。