城中鏡：首次上鏡 幟哥隊酒壯膽

中廚起薪媲美大學生

幟哥憶述當年嘅經歷確係一殼眼淚，話說當年第一次以顧問身份拍攝電視飲食節目，冇出鏡經驗嘅佢一埋位就「發台瘟」狂食螺絲，後來接受導演建議飲兩罐啤酒壯膽，點知連白蘭地飲清光都冇好轉，激到導演想即時易角。唔認輸嘅幟哥提議當晚請導演唱卡拉OK再飲過，第二日埋位真係得咗，順利完成拍攝。

講起本港中廚界仍然有三、四萬個空缺「有工冇人做」，餐務管理協會主席楊位醒話，依家中廚起薪點已有一萬一千元，媲美唔少大學生，廚房內有冷氣，亦有進修機會，要成為年薪過百萬元嘅酒店中菜部行政總廚都唔係難過登天，呼籲有志年輕人放低成見入行喎！