話說身兼行政會議成員嘅立法會議員葉劉淑儀，喺上月十六日接受港台電視部節目《星期六主場》訪問時，疑受到主持麥嘉緯「不專業及不禮貌對待」，因此上月十九日去信廣播處長鄧忍光作書面投訴，事隔十日後，鄧忍光回信予葉劉話明白其感受並接受批評，又希望葉劉唔會視節目主持嘅直率為無禮喎！

葉劉淑儀

葉劉尋日喺社交網站透露此次書面投訴嘅原委，話當日出席節目訪問時，主持未有給予足夠時間同機會畀佢詳盡回答問題，之後到佢本人發表意見時，主持又多次以高聲掩蓋佢嘅回應，同時又發問其他問題，以致整個訪問中沒有機會表達意見，也無法理性及深入討論，因此去信鄧忍光投訴。

佢強調滿意鄧忍光嘅回覆，又認為呢個節目係港台節目，由港台內部處理就可以，毋須提升向通訊事務管理局投訴，此舉也非針對任何人，希望日後嘉賓能在持平同客觀環境下作理性深入討論。

第一手消息請下載on.cc東網iPhone/iPad/Android/Windows Phone Apps