由八十年代開始出任新界鄉議局主席嘅立法會議員劉皇發喺今年六月換屆退下火線，佢大仔劉業強喺無競爭情況下自動當選為鄉議局主席。劉業強上場百幾日以來，已走勻新界二十七鄉了解鄉情，整理好之後會向政府提交報告。據講最令村民不滿嘅係鄉議局每逢選舉都要幫建制派「抬轎」，抬足十八年，但建制派就似乎沒有為新界傳統權益發聲，有人就建議劉業強向建制派清算呢筆舊帳。
新界事務唔可以靠政黨
據聞呢份快將出爐嘅鄉情報告，反映咗村民二十五個最關注嘅議題，包括僭建、郊野公園土地爭議、興建多層丁屋等。原來喺芸芸議題中，最令村民關注同憤慨嘅，係鄉議局幫建制派「抬轎」抬足十八年，特別係幫建仔最多，但建仔甚少喺立會為新界議題發聲。有人就建議，與其依靠建仔，不如自己組黨派人參選。由於鄉議局係法定機構，唔可以用鄉議局名義組黨，就算真係組黨都要改名。
有鄉紳話，建仔唔單止無幫新界人發聲，喺鄉議局亦會構成阻力，不如索性去建仔化。鄉紳認為新界事務根本唔可以靠政黨，因為政黨同鄉事之間本來就存在好大分野：「政黨講政治理念，政治理念不同就話可以退黨；但鄉事講血緣，一切以村民利益為依歸，就算幾唔滿意都唔可以入祠堂拎走個神主牌，然後當無事發生！」但話時話，鄉議局副主席張學明本身就係建仔黨員，莫非呢番說話衝住佢而嚟？
講開又講，每年農曆年初二車公誕，發叔都會去沙田車公廟為香港求籤，依家佢卸下鄉議局主席一職，好多人都關注明年會由邊個去求籤。發叔每年求完籤都會解籤，有人擔心解籤唔係個個應付得嚟，一唔小心解錯籤隨時引起軒然大波，建議不如以後求籤、解籤分工算喎。
第一手消息請下載on.cc東網
