馮檢基（左一）搵兒子Benny（右一）教小朋友英文同跳舞。
老實講，從政人士要討街坊歡心確實唔容易，通常連屋企人都要搬埋出嚟。立法會議員馮檢基都唔例外，佢個仔Benny馮本一身高同外形明顯比爸爸高一截，當然係被出賣嘅好對象啦！Benny依家喺英國讀緊書，暑假就返港幫爸爸教小朋友英文同跳舞，氹得小朋友嘻嘻哈哈。
呢班小朋友約十歲，全部小班教學約五、六個人，Benny打親民牌，小朋友都唔拘謹，笑住大叫「阿Sir比較樣衰」，一時又話佢教得好，一時又話佢教得唔好，仲大爆Benny上堂玩手機添！Benny忍唔住辯護「唔用手機點搵你哋呀」，被人蝦到毫無還擊之力。
被小朋友蝦完，到Benny就笑住寸爸爸英文「咁好」，教唔到呢啲班喎。不過，佢都氹番爸爸話，暑假之後明白點解爸爸工作時間咁長，而見到小朋友有進步，都覺得好有滿足感。
第一手消息請下載on.cc東網
