來港遊客減少，香港旅遊業同零售業步入寒冬，業界都紛紛度橋救市。經民聯日前就高調召開記者會，建議容許二千萬名有電子護照的內地居民透過網上簽證來香港，本身係行政會議兼立法會議員嘅經民聯副主席林健鋒及與他同屬經民聯的旅遊發展局主席「肥仔岳」林建岳，當然將建議吹噓到天上有地下無啦！眾所周知，護照是一個國家發給國民出入境的證件，香港本身就是中國一部分，內地人又點可能透過護照出入香港呢？莫非林健鋒同肥仔岳想搞港獨？
審批權移交港府荒謬
經民聯日前向特首梁振英建議，指現時有八千萬名持中國護照的內地居民，當中二千萬人有電子護照，可以容許佢哋經網上申請簽證來港旅遊，由內地負責審批。林健鋒就話現時內地有四十九個個人遊城市，內地居民想申請以個人遊方式來港就要返原居地申請，所以該黨嘅建議有較大彈性，亦都方便更多優質旅客來港。而肥仔岳亦賣花讚花香，指建議是優質計劃，唔會增加香港承受力喎。
其實醒少少都知道呢個建議並唔可行，眾所周知內地居民來港，不論係旅遊、探親或營商，從來都只可以申請雙程證，並由內地官方審批，如果只持有護照，就只能夠喺香港轉機過境。現時雙程證嘅審批權喺內地，如果改為以電子護照取得簽證，審批權豈不是落喺香港手上？特區政府都有國家護照審批權？但如果審批權唔喺香港，正如該黨建議依舊由內地負責，咁又同雙程證制度有幾大分別呢？
更加重要嘅係，護照是國家對國家使用的，林健鋒同肥仔岳一個係行政會議成員，一個係旅發局主席，冇理由唔知呢個係涉及國家領土完整問題嘅政治禁區。究竟係佢哋個腦閉塞諗出屎橋？抑或想搞港獨呢？有知情人士指出，內地人係咪想來香港旅遊，唔係因為申請證件便利，而係要靠香港嘅吸引力，面對反水貨客同趕客行動，如此「貼錢買難受」，想搵人嚟都難啦！
第一手消息請下載on.cc東網
