政壇：兜巴星：五鐵總遲橋不通 張炳管唔掂

港鐵五個新鐵路工程至今已超支逾三百二十億元，其中高鐵香港段工程延誤超支愈嚟愈嚴重，工程備用基金隨時「乾塘」，承建商擬集體跳船頻停工；而近日再爆出港珠澳大橋嘅香港口岸人工島填海土地移動高達七米，路政署署長仲死撐話飄移係正常，又話早就講過大橋香港段未能喺明年完工。官字兩把口，兩項大型工程本身經已超支，分分鐘又要用公帑、即係市民血汗錢嚟「填氹」。現今「五鐵總遲、橋路不通」嘅亂局，反映運輸及房屋局局長「張炳」張炳良監察不力，再加上機場第三跑道未知幾時先起到，即係海陸空都唔掂，張炳因住被兜走！