講起中秋節，楊釗（左）最懷念豆沙月餅，孫大倫（右）就難忘同囝囝煲蠟。
今日就係人月兩團圓嘅中秋節，但幾十年前香港經濟尚未起飛時，中秋節團聚並唔容易，大家忙住搵食之餘，仲好節儉，小朋友圍埋一齊玩吓遊戲已經好開心。講起童年嘅中秋回憶，中華總商會會長楊釗就好雀躍，仲話對豆沙月餅有種情意結，事關佢細個家境清貧，眾多兄弟姊妹通常都一齊食最便宜嘅豆沙月餅，所以依家諗起都特別甜在心頭。
袁武（右）童心未泯戴氣球帽出席中秋節活動，與莊學山（左）話當年。
提到中秋節最懷念嘅活動，楊釗就話係猜燈謎喇，因為猜中咗有糖食。小時候通常好易滿足，一大棚兄弟姊妹，節日參加吓啲社區活動，就非常熱鬧。副會長莊學山亦有同感，認為小時候嘅節日同現在最大分別，就係嗰種人與人之間嘅互動，佢話以前左鄰右里啲小朋友都好熟絡，大家唔需要咩燈籠，一齊落公園玩「大風吹」、「十字鎅豆腐」，已足夠樂透半天。
孫大倫煲蠟當反面教材
至於副會長袁武就話以前買月餅好貴，中秋完咗冇耐，就已經要供定下一年嘅「月餅會」，當時每個月最少都要供成十幾蚊。當年又冇咁多玩具，好多時燈籠都係靠自己一手一腳用碌柚皮製作，入面加支蠟燭就拎住周圍去玩。講到玩，會董孫大倫最大膽，學人玩煲蠟，仲陪囝囝一齊玩添！
孫大倫話囝囝細個嗰時，兩父子一齊玩煲蠟，因為有時愈唔畀小朋友接觸嘅嘢，小朋友就愈好奇。只要做足安全措施，當反面教材咁教小朋友煲蠟會有幾危險，令佢哋更加學識保護自己，面對問題唔會逃避。
第一手消息請下載on.cc東網
