政壇：搞搞政：潘佩璆勸收錢議員「自我了斷」

建制派可能贏多幾席

早前捲入捐款醜聞嘅幾位議員，包括工黨李卓人、白鴿黨涂謹申、公文袋梁家傑同毛孟靜及社民連「長毛」梁國雄，雖然長毛同阿人承認收受捐款，但其他人矢口否認，但呢件事已令五人形象大插水。潘佩璆唔知係咪靈機一觸，尋日就在社交網站留言獻計話，邊使二十七個泛民議員集體總辭呀，只要涉事嘅幾位議員肯辭職就一天光晒喇！

由於年前已通過「遞補機制」，辭職議員唔可以再喺半年內重選，只能安排黨友或其他友好參選，如果五位捲入政治獻金醜聞嘅議員都一齊辭職，咁樣起碼對市民負責，算係一種「自我了斷」，亦能減少對所屬政黨嘅傷害，總好過事件不斷發酵，等待真正換屆選舉時任由選民懲罰。

其實潘佩璆之所以提出呢個方案，好大程度係基於佢睇高建制派選情，佢話一旦有五位議員辭職，補選時建制派可能贏多幾席，屆時泛民輸咗幾席，就算投晒反對票都否決唔到政改方案，咁咪可以一邊鬧，一邊投反對票，但又唔怕做歷史罪人囉！