政壇：鮑誠業豪宅防盜 自動噴椒霧驅賊
近期發生多宗豪宅爆竊案，仁濟醫院前總理Sammy鮑誠業嘅西貢寓所早前亦不幸被光顧，損失逾七十萬元財物。事後佢將屋企嘅防盜裝備全面升級，除咗布下天羅地網的防盜警鐘同攝錄機之外，最有趣係竟然安裝胡椒噴霧，一旦警鐘大作，裝置即自動噴出胡椒，令賊人知難而退。
鮑誠業家中加設胡椒噴霧裝置，提升防盜級別。
Sammy話當保安公司向佢推介安裝胡椒噴霧時，佢都係第一次聽有啲咁嘅嘢，估唔到警方控制示威場面、維持公眾秩序時使用嘅胡椒噴霧，亦可以用於住宅，但據聞丹麥已經用咗二十幾年，香港大約引入咗兩年。安裝後佢曾經試用，結果令人難受嘅味道要成個鐘至散去，相信抗賊成效唔錯。
講起今次屋企被爆竊，佢好淡定，反而太太喺事後好唔安樂，嚷着要搬屋上樓，唔想住獨立屋。今次佢畀足心機加強保安，相信應該會安全好多。
