甘文鋒
自從新民黨同公民力量結盟後可謂人才濟濟，雖然各行業嘅專業人士都有，但相信營養師呢個專業就比較少見。該黨青年委員會前主席甘文鋒除咗係香港彈網技術委員會委員兼國際裁判外，最近仲去咗珠海考取內地營養師牌照，唔知黨主席葉劉淑儀會唔會得閒搵阿鋒問吓飲食方面嘅意見呢？
阿鋒透露，早前到內地修讀中國人力資源和社會保障部嘅公共營養師證書課程，當初修讀課程純為興趣，同黨嘅工作無關，但自從了解多咗營養學方面嘅知識，依家飲食都節制咗好多，喺街外食得多肥膩嘢，返屋企就要自行「懺悔」食番清淡啲。
不過，由於香港未有機制認可內地具營養師資歷嘅人，所以阿鋒就算有冇考取牌照，都只可以自稱營養師。佢六月考牌至今都未知考試結果，預計要到年底先有消息。講到等得耐，阿鋒同未婚妻Claire嘅親事就更加等極都未到，原來佢揚言要等明年區議會選舉結束後先會娶未婚妻過門，似乎Claire需要嘅耐性更加大喎！
第一手消息請下載on.cc東網
