政壇：訂樹木法 陳茂波龜縮
羅便臣道「塌樹殺人事件」造成一名孕婦死亡，唔少團體再次要求政府訂立樹木法加強規管樹木管理，屬於護養樹木嘅「最高統帥」發展局局長「波波」陳茂波龜縮三個幾星期後，終於喺網誌回應立法工作。不過，波波講嚟講去都係三幅被，話對立法持開放態度，但認為影響深遠，要謹慎研究。有團體就批評佢執前發展局局長口水尾，要求佢唔好再用「研究」做藉口，盡快公布立法方向、內容同時間表。
設計圖片及對白
網誌猛講做咗好多嘢
致命塌樹意外喺上月十四號發生，事後唔少人批評政府監管不力，早幾日更有學者批評政府治理樹木疾病嘅指引不清。波波尋日終於再做「鍵盤戰士」，喺網誌「開腔」回應樹木管理問題，話規管私人土地嘅樹木都係由地段業主負責護養，樹木辦每年都會喺風雨季節之前發信畀業主同物業管理公司，提醒佢哋妥善護養樹木，又會舉辦講座講解點護樹，過去兩個星期更加特別加開咗幾場講座添。講到尾，咪又係事後補鑊！
網誌用大篇幅大力推銷政府做咗幾多嘢，但一講到訂立樹木法，波波就即刻龜縮，話政府持審慎開放態度，會聽唔同意見，但又話立法影響深遠，要謹慎研究，覺得依家透過公眾教育及全民監察加強護理樹木仲切實可行喎。
一直倡議訂立樹木法嘅長春社總監蘇國賢就鬧爆波波舊調重彈，甚至覺得佢唔夠上屆發展局局長咁強硬，對方至少話會認真研究，「陳茂波只係搬番舊嗰套出嚟，但政府咁多年做過啲咩？會唔會等到下屆又再話研究？係咪吓吓要到發生意外先肯做嘢？」
蘇國賢話部分業主可能對立法有保留，亦擔心有業主可能會响立法緩衝期斬樹，但佢認為政府至少要公布立法方向、內容同時間表，因為依家私人屋苑嘅高齡樹木愈來愈多，倒塌風險只會有增無減，再咁落去，市民條命仔真係危危乎。
