眾所周知，香港藝術發展局主席王英偉個仔係歌手，當然好想向多線發展喇！王英偉個仔Jonathan王梓軒尋日出席一個公開活動時，就好驚青咁憶述早前拍攝一個鬼古節目嘅靈異事件，佢話：「嗰集係講我扮女鬼上身，拍之前喺服裝車外面練習，幾次都眼前一黑睇唔到嘢，真係驚o架，標晒冷汗同面青口唇白，後尾有人幫我祈禱後就冇事。」

王梓軒懷疑自己疲勞過度，搞到拍劇時幾次眼前一黑睇唔到嘢。

Jonathan又話曾經懷疑係自己疲勞過度所致，又話：「因為拍鬼古前拍緊音樂電影，短短二十分鐘電影，由排舞到配音至少用咗三日，可能加埋天氣熱有啲中暑啩。」不過，佢又強調之前從未遇過咁嘅情況，所以當時好驚恐。

第一手消息請下載on.cc東網iPhone/iPad/Android/Windows Phone Apps