陸恭蕙同區詠芷約咗張華峰飲茶傾偈。
由於平時出入立法會講解政策都由局長上陣，令到啲副局長同政治助理慘淪陪襯品，甚至知名度好低。眼見自己去勻大小活動都無助提升知名度，一班副局同政助最近諗到條好橋，就係閒時去位於金鐘政府總部後面嘅社企餐廳打躉，見到議員就衝上前「派片」。
蕭偉強（左）同黎穎瑜（中）一見到張華峰，即上前派片。
見議員就主動上前
副局長同政助嘅知名度低已經唔係新聞，但唔係個個都好似商務及經濟發展局副局長梁敬國咁，因為「有幸」被立法會主席曾鈺成「唔認得」而聲名大噪。
與其企喺度等人識，新上任嘅勞工及福利局副局長Stephen蕭偉強同政助Jade黎穎瑜就決定主動出擊去社企餐廳亮相，一有議員出現就上前傾兩句，博對方日後認得自己。
上星期有日就見到Stephen同Jade呢對孖公仔出動，適逢金融服務界議員張華峰約咗環境局副局陸恭蕙同政助區詠芷傾偈，兩人都唔怕醜上前搭訕兼派卡片，同場仲有民政事務局副局長許曉暉同友人飲茶。如果議員日後搵唔到啲副局政助，可以考慮去社企餐廳搵人。
第一手消息請下載on.cc東網
