內地接連發生少女乘搭黑車被殺、被辱或者失蹤大案，搞到人心惶惶。本港警方或者知驚啩，最近發起連串行動嚴打「黑的」。嗱，加強執法本來係好事，結果竟然搞到班司機大佬媽媽聲，問你服未！

係咁嘅，警方嚴打黑的嘅同時，順手檢控超過一年冇更換的士司機證嘅司機。原來根據法例，擺喺車頭顯眼位置嘅的士司機證，必須附有司機一年內拍攝嘅近照，亦即係話，司機每年都要換證，違者可被罰款二千大元。問題係，對於呢條實施咗廿年嘅例，莫講話司機大佬聞所未聞，連工會都一頭霧水，直到近日行家被檢控，運輸署迫於壓力出面解畫，大家先知嘅咋，你話當局係咪靠害吖。

當局唔聲唔聲，話拉人就拉人，不教而誅，司機大佬唔慶就假。正如有工會代表話齋，運輸署一直冇提及司機證要年年更換，而對上一次大規模換證已經係○九年嘅事，當時只係話要更改張證嘅設計，隻字不提每年換證嘅規定，估計全港五萬名的士司機裏面，九成九誤墮法網而不自知。佢又批評當局要求司機年年換證擾民，仲揚言如果當局拒絕修例，唔排除發起抗議行動添。

呢，冤有頭，債有主，運輸署着實抵鬧。單講張司機證，就好有問題喇，由於上面冇寫明生效日期同屆滿日期，好多人根本唔知有「換證」呢回事。咁又係呀，車牌同護照有到期日，大家識到時到候換證，點解運輸署唔喺司機證上註明有效日期呢？咁搞法，直頭設陷阱引人犯罪喇！

即係咁，司機證嘅原意除咗方便當局執法，亦係方便乘客確定司機身份，要求附上司機近照以及每年換證，本來都係無可厚非嘅。之但係講到宣傳不力咯喎，運輸署肯定吟詩都吟唔甩o架嘞，最好笑嘅係，運輸署居然仲死撐，話已經透過署方網頁、的士事務會議同《的士通訊》等渠道，提醒司機相關法規喎。

呢啲咪叫解釋等於掩飾囉！運輸署網頁有幾多人睇，佢哋自己心裏有數。至於《的士通訊》，唔知大家聽過未，太一叮都係上網查一大輪至知原來係運輸署嘅免費刊物，旨意佢推廣宣傳，盞嘥氣喇！

講起宣傳推廣，有件事太一叮諗極都唔明。運輸署要宣傳法例，查實簡單到極，只要喺東方報業集團落廣告，幾百萬讀者即時收到，又點會搞到依家一鑊泡吖？叮！

第一手消息請下載on.cc東網iPhone/iPad/Android/Windows Phone Apps